Сылын ахсын тохсунньу ыйыттан оҕуруот аһын, сибэкки арааһын арассадалаан олордон, Сахабыт сирин кылгас сайыныгар оҕуруот аһын өлгөмнүк баһар туһуттан нэһилиэк хаһаайкалара түбүк бөҕө буолабыт. Бу хамсааһыны өйөөн, Хара-Алдан нэһилиэгэр «Тиэргэн» оҕуруотчуттар түмсүүлэрэ үлэлиир. Түмсүү 2010 сыллаахтан олохтоох библиэтиэкэр Старостина М.И. көҕүлээһинэн тэриллибитэ уонна сылын ахсын күһүөрү оҕуруот аһын дьаарбаҥката, онтон саас арассаада атыы-атастаһыы тэрээһиннэрэ буолаллар.

2024 сыл күһүнүгэр, Хара-Алданнааҕы олохтоох библиотека,  сайын устата төһө оҕуруот аһа хомуйдулар диэн хас биирдии оҕуруотчуттартан ыйыталаһан, нэһилиэк үрдүнэн  50-ча хаһаайыстыбаны уопсайдаан биир түмүк  таһаардыбыппыт.

Хара-Алдан нэһилиэгэр 2024 сылга оҕуруот аһын үүнүүтэ:

Оҕурсу — 5500 киилэ

Помидор — 1500 киилэ

Биэрэс (минньигэс,  аһыы) —  145 киилэ

Кабачок — 1050 киилэ

Арбуз — 30 киилэ

Дыня — 2,5 киилэ

Тыква — 180 киилэ

Клубника, дьэдьэн — 30 киилэ

Хаппыыста — 130 киилэ

Баклажан — 4 киилэ

Уохта — 780 киилэ

Онтон быйылгы сааскы түмсүү, ыам ыйын 16 күнүгэр, олохтоох библиотекаҕа буолан ааста. Тэрээһин сүрүн чааһыгар Хара-Алдан нэһилиэгин бочуоттаах олохтооҕо, үлэ бэтэрээнэ Захарова Варвара Ивановна бэйэтин оҕуруотун, саадын туһунан презентациянан сырдатта, туһалаах сүбэлэринэн, сатабылларынан үллэһиннэ. Ол курдук, Варвара Ивановна оҕурсууттан саҕалаан тыкваҕа тиийэ араас оҕуруот аһын олордон сиэннэрин, чугас дьоннорун хааччыйар эбит. Ону таһынан тэлгэһэтигэр  бузина, долохоно, хаппырыас,  акация, яблоня, вишня мастарын олордубут уонна быйыл арассаада тэпилиссэтэ диэн оттуллар оһохтоох кыракый дьоҕус дьиэ туппуттар эбит. Кэлбит дьон уопуттаах оҕуруотчукка ыйытыктарын биэрэн, эппиэт ылан сэҥээрэн көрдүлэр-иһиттилэр.

Салгыы, олохтоох библиэтиэкэр Никулина Ульяна Ивановна, Кытай сириттэн табаардары сакаастыыр “Алиэкспресс” маҕаһыыныгар баар оҕуруокка, саадка туттуллар тэриллэри улахан экраҥҥа көрдөрөн “Бу тугуй” диэн оонньууну оонньотто. Түмсүү кыттыылаахтара сорох табаардары көрөн ымсыырдылар, сорохтон сөхтүлэр.

Түмсүү түмүгэр оҕуруотчуттар  санааларын атастаһан,  сибэкки, оҕуруот аһа арассаадаларын атыылаан-атастаһан, аны күһүҥҥэ дылы тарҕастыбыт.