Дьоллоохтук, ыалдьыбакка олоруу боппуруоһа киһи аймах үөскүөҕүттэн сир көхсүгэр олорор норуоттары барыларын таарыйар биир сытыы проблеманан буолар. Онон, ханнык да омугуттан тутулуга суох, киһи барыта төһө кыалларынан бу сир үрдүгэр уһуннук олорорго кыһанар. Билигин, 21 үйэ тэтиминэн, араас технологиялар, искуственнай интеллект (өй) сайданнар киһи доруобуйатын бөҕөргөтөр араас ньымалар киирэ тураллар.
Олунньу 3 күнүгэр олохтоох библиотека дьиэлэринэн кэрийэ сылдьан скрининг-марафон ыытта. Бу тэрээһиҥҥэ доруобайаларынан хааччахтаах аҕам саастаахтар искусственнай интеллект уонна аныгы смарт-технологиялары кытта билистилэр. Киһи этин-сиинин туһунан чахчылары биллиилээх суруналыыс, кыраайы үөрэтээччи, энтузиаст, общественник, коллекционер Иннокентий Неустроев “Доруобуйа-дьол” кинигэтиттэн аахтылар. Салгыы Xiaomi диэн китайскай хампаанньа киһи этин-сиинин ыйааһынын, састаабын көрдөрөр «өйдөөх ыйааһыны» кытары билиһиннэрдибит уонна барыларын бу ыйааһын көмөтүнэн эттэрин, былчыҥнарын, ууларын ырытан көрдүбүт. Аҕам саастаах ааҕааччыларбыт ыытыллыбыт тэрээһин тематын интэриэһиргээтилэр, сэргэхсийдилэр.
Өйдөөх ыйааһын олохтоох библиотекаҕа олунньу ыйы быһа үлэлиэҕэ, ким баҕалаах үлэ бириэмэтигэр кэлэн эккитин-сииҥҥитин скрининнаан көрүөххүтүн сөп.