«Тардыы көмүс талахтаах талахтаах, таалар налыы хонуулаах, таналайдаах чабычахтаах, талба нарын кыргыттардаах, куба курдук хотуттардаах, субан туруйа курдук уолаттардаах, олоҥхоһут оҕонньоттордоох, ырыаһыт ыччаттардаах Таатта оҕото Дьаралыктыйа Былатыан диэн мин буолабын, доҕоттоор!» – диэбитэ саха норуотун чулуу уола Платон Алексеевич Ойуунускай.

Саха норуота барыта киэҥ туттар киһитэ, Улуу Өктөөп буурҕатыгар хатыллан үлэһит норуоту көмүскээччи, батталлаах былааһы утары тулхадыйбат охсуһааччы, төлөннөөх революционер, биллиилээх государственнай , общественнай деятель, учуонай, талааннаах суруйааччы Платон Алексеевич Ойуунускай быйыл төрөөбүтэ 130 сыла.

Ол курдук сэтинньи 6 күнүгэр Хара-Алдан орто оскуолатын 5-6 кылааһын үөрэнээччилэригэр  суруйааччы олоҕун, оҕо сааһын кытта билиһинэрэр сыаллаах «Улуу Ойуунускай»  уруок ыыттыбыт. Уруокка о5олор П.А. Ойуунускай  күн сырдыгын көрүөҕүттэн эрэйи эҥэринэн тэлэн, аччыктыыр амырыынын барытын этинэн-хаанынан билэн улааппытын ,  хайдах үөрэхтээхтээх киһи буолбутун туһунан сэргээн иһиттилэр,  «Өйдөөх оҕо» кэпсээнин ааҕан ырыттыллар.

Уруок иккис чааһыгар улуустааҕы «Туллукчаан» оҕо библиотеката ыытар “Мин аатым ааттаныа” өрөспүүбүлүкэтээҕи ЛЕТТЕРИНГ куонкуруһун балаһыанньатын кытта билистилэр, Леттеринг техникатын үөрэттилэр уонна куонкурса кыттар үлэлэрин оҥордулар.

Сэтинньи 11 күнүгэр, Былатыан Ойуунускай төрөөбүт күнүгэр,  «Аллан» НАДь, Бэтэрээн Сэбиэтэ уона библиотека көҕүлээһининэн  «Улуу Ойуунускай» бэрт сэргэх литературнай биэчэр буолан ааста. 

Биэчэр саҕаланыытыгар  улуустааҕы «Туллукчаан» оҕо библиотеката  оҥорбут суруйааччы олоҕун туһунан видеосюжет көрдүбүт, салгыы  Хара-Алдан орто оскуолатын үөрэнээччилэрэ суруйааччы хоһооннорун , Самсонов П.Е. — Бүөтүр Хара «Дьулуруйар Ньургун Боотур» олоҥхоттон быһа т ардан ааҕан иһиниттэрдилэр.  У.И. Никулина «Ойуунускай олоҥхото»,  Ж.А. Колодезникова «Ойуунускай уонна театр», М.И.Старостин «Ойуунускай лириката» темаларынан иһитиннэрии оҥордулар. 

Түмүккэ Бэтэрээн Сэбиэтэ С.Руфов «Мотуруоса сиэнэбин» хоһоонунан уус-уран дьүһүйүү көрдөрдүлэр.