Сарсыарда сытынан

Сайылык аҥыйар,

Мин курдук уһуктан

Биир чыычаах саҥарар.

Кэпсэтэн эрэрдии

Кэҕиҥнии-кэҕиҥнии —

Дьоҕустай бэйэтэ

Дьохсоллон олордо.

Чу-бу-чуубурҕаан

Чуумпуну аймаата,

Чочумча син тохтоон

Толкуйдуу санаата.

Чу-бу-чууп чуубурҕаан

Туох диирин билбэтим,

Дьоҕустай төбөтүн

Толкуйун таайбатым.

Көрүдьүөс тойугар

Күүстэрбин көмтөрөн —

Көтөрүм олоҕор

Көҕүйэ санаатым.

С.П.Данилов.Талыллыбыт айымньылар. Том  1. 1984.

Үрдүк түннүктээх титииккэ

Ынахтар кэбиннилэр;

Ыан бүтүөххэ тиийбэккэ,

Ньирэйдэр мөҕүстүлэр.

Ньирэй ымсыырбыт хараҕар

Ийэтин минньигэс үүтэ

Ойуулаах ыаҕайа айаҕар

Көнньүнэн күүгэннии сүүрдэ.

Имигэс имигэстик имитэн,

Наҕыл-наҕыллык тардыалаан,

Ыанньыксыт үөрүйэх илиитэ

Ыаммытынан хойуу үүтүнэн

Ыаҕас-ыаҕаһы толордо.

Араҕас илгэнэн туолан

Турдулар оһуордаах ыаҕастар,

Ыллаан барда ангы тылынан

Быйаҥ туһунан сэппэрээтэр.

Үчүгэйиэн, саппыйа саадьаҕай

Ньирэй тигилээн ойоро,

Ырыа аргыстаах кыргыттардаах

Баай колхоз сайылыгар.

С.П.Данилов.Талыллыбыт айымньылар. Том  1. 1984.

Күөллэр муустаах тураллар.

Күлүк сиргэ хаар сытар,

-Көмүс күөмэй — күөрэгэй,

Кээлтиҥ тугун эрдэтэй!

-Кынаппынан силэйэн,

Хаары күрдьэр инибин,

Күөлгүт мууһун битийэн,

Көлбөрүтүөм — дэнэбин.

-Көрдөөх көтөр — күөрэгэй

Кэпсиириҥ тугун дэлэйэй?

Хайаан барытын кыайыаҥый?!

Кыайбатаххына хайыаҥый?

-Күн анныгар тахсаммын,

Көрүлүү көтө сылдьаммын,

Ырыа:тойук түһэриэм —

Ырыабынан ириэриэм.

С.П.Данилов.Талыллыбыт айымньылар. Том  1. 1984.

Киһиэхэ төрөөбүт дойдута

Төрөппүт ийэтин кэриэтэ:

Сүрэҕин ытатан, ыллатан,

Норуот кырдьыгар үөрэтэр.

Киһиэхэ — төрөөбүт дойдута

Төрөппүт аҕаҕа холонор:

Тоҥорон, буһаран, эрчитэн,

Ньыгыл укулаат оҥорор.

С.П. Данилов. Саҥа күн. 1971 .

Сыһыыга, тумулга —

Сибэкки ыһыаҕа.

Бу чыычаах дойдута

Ырыаҕа аһаҕас.

Мин үөрэ турабын

Мөндүрэ тумулга:

Тапталбын — ырыабын

Тамныыбын тыалларга.

Сыһыыга тамныыбын

Сардаана үүннүн диэн.

Талахха тамныыбын

Татыйык туойдун диэн.

Далбаатыыр сөп-сөрүүн

Дөйбүүрүн аар хатыҥ…

Билэбин мин үөрүүм

Бүппэтин, ааспатын.

Сыһыыга, тумулга —

Сибэкки ыһыаҕа.

Үөр чыычаах дойдута

Үөрүүтэ аһаҕас.

С.П.Данилов. Манчаары маҥан ата. 1973.